أحمد مرتضى منصور: “ممدوح عباس صرف الملايين لإقصاء والدي.. والنتائج كانت صفر بطولات”

فتح أحمد مرتضى منصور، عضو مجلس إدارة نادي الزمالك الأسبق، النار على فترة رئاسة ممدوح عباس للنادي، مؤكدًا أن الزمالك عانى إداريًا وماليًا خلال هذه الحقبة، دون أن تُحقق أي إنجازات تُذكر.

وفي تصريحات عبر برنامج “بودكاست جول كاست“، قال أحمد مرتضى:”ممدوح عباس صرف ملايين الجنيهات عشان يمشي مرتضى منصور، وكان الأولى إنه يحط الفلوس دي في النادي بدل الصراعات، كان بيأجر قنوات ويستعين ببعض الجماهير، وحتى محاميه بقى مليونير من ورا قضايا النادي، رفع 200 قضية على الزمالك و200 على مرتضى منصور”.

“ولا بطولة في ولا سنة.. والفجوة مع الأهلي كانت فادحة”

وأضاف:”ممدوح عباس مسك النادي سنة 2007، ومحققش ولا بطولة. لما خرجت من النادي سنة 2005، الزمالك كان عنده 5 بطولات أفريقية، والأهلي 3، لما رجعت لقيت الفجوة كبرت بشكل غير طبيعي”.

“الإدارة مش فلوس بس.. الكرة علم”

وتابع:”ممدوح عباس يمكن زعل لأنه محققش نجاح، بس الإدارة مش فلوس بس، لازم خبرة وعلم وتنويع في مجلس الإدارة. سمعته بيقول عايز يجيب لاعبين سوبر، طيب ما أنت جبت لاعيبة قبل كده، فين كانت النتائج؟ الكرة دلوقتي بقت علم وتحليل، مش بالفلوس لوحدها”.

“حجز على النادي 10 مرات.. والمستقبل مقلق”

وأوضح أحمد مرتضى أن عباس تسبب في أزمة مالية متكررة للنادي:”أنا كنت عضو مجلس إدارة وقت ما تم الحجز على النادي 10 مرات، بيقول إنه سلف الزمالك، لكن ما فيش أوراق قانونية تثبت ده، ومع ذلك خد أحكام قضائية”.

وحذر من تكرار نفس السيناريو:”أنا خايف إنه بيقرض النادي تاني وياخد شيكات، واللي جاي ممكن يلاقي نفسه بيتبهدل، هل بتحط فلوسك في النادي حبًا فيه ولا علشان تتحكم فيه؟”.

“اللي جاي أسوأ.. مفيش شفافية ولا خطة”

واختتم تصريحاته برسالة تحذيرية:”دلوقتي مفيش شفافية، لما تركي آل الشيخ دفع فلوس، مرتضى أعلن الرقم، لكن دلوقتي مش عارفين حاجة. للأسف، أنا شايف إن الجاي للزمالك هيكون أسوأ، لأن مفيش خطة ولا رؤية، كله عشوائي”.

وأشار في ختام حديثه إلى المعاناة المالية السابقة:”في 2013 دخلنا النادي لقينا في الخزنة 700 جنيه! كنا بندي عمر جابر وشيكابالا 10 آلاف جنيه، وكان في لاعيبة بتطلب 500 جنيه علشان البنزين، الوضع كان مأساوي بسبب غياب الإدارة”.