“أنت غاوي الناس ترفع عليك قضية”.. إسلام خليل يهاجم رضا البحراوي 

هاجم الشاعر إسلام خليل، المطرب رضا البحراوي، عقب غنائه في الأفراح والمناسبات أعاني ليست له، مؤكدًا أن هذا يعتبر تعديًا على حقوقها الفكرية والملكية، أنه يجب أن يصنع أعماله الخاصة.

شارك إسلام خليل متابعيه مقطع فيديو بموقع تيك توك، قائلًا فيه: “يا أستاذ رضا في حاجة اسمها حقوق الملكية الفكرية الكلمة زي الفلوس والدهب، لما تتاخد بدون وجه حق فدي سرقة، وأنت المفروض بقيت نجم وبقى ليك اسم، والمفروض تصرفاتك تكون قد النجومية اللي بقيت فيها”.

وأضاف الشاعر إسلام خليل لحديثه قائلًا: “اطلب منى أغنية وأنا هكتبهالك هدية، لو مش عايز تدفع حقها، وأنا غني عن التعريف بأعمال الكتير اللي قدمتها كفاية تاريخي الطويل مع الفنان شعبان عبد الرحيم”.

واستكمل “خليل”: “وكل الألحان الفنان شعبان عبد الرحيم مسجلة في جمعية المؤلفين والملحنين باسمي، ولا أنت غاوي الناس ترفع عليك قضية، أنا عارف إنك لسه دافع مبلغ، بسبب لحن قديم أنت غنيته وابنه خد منك فلوس”.

وأكد الشاعر حديثه قائلًا: “إذا كان عدوية عبد الرحيم زعلان أن أغنيته اللي هو تعبان فيها ومسجلها وطالع عينه وعايز الغنوة تتعرف علشان يشتغل أنت غنتها، إزاي تستحوذ على أغنية مش ملكك كأنك بتقطع عيش الناس”.

وقال إسلام خليل: “دا مينفعش المفروض أنت اللي تساعد طالما بقيت نجم، أنا مستني منك الرد إنك تقول مش هعمل كدة تاني، لأن الأغاني اللي أنت حتى اتعرفت بيها مش بتاعتك، اعمل لنفسك تاريخ وسجل أغاني يبقى عندك رصيد لكن هتعيش على أغاني الناس”.