عبّر البرتغالي جوزيه بيسيرو، المدير الفني لنادي الزمالك، عن حزنه الشديد بعد خسارة فريقه أمام ستيلينبوش الجنوب إفريقي في مباراة إياب ربع نهائي كأس الكونفدرالية، مؤكدًا أن الزمالك لم يكن يستحق الخروج.
وقال بيسيرو خلال المؤتمر الصحفي عقب اللقاء: “فريق ستيلينبوش صنع فرصة واحدة فقط طوال المباراة وسجل منها هدفه، بينما الزمالك خلق عدة فرص لكن لم ننجح في ترجمتها لأهداف، وده بيحصل في كرة القدم”.
وأضاف: “المنافس اعتمد على الدفاع طوال اللقاء، وكان أقوى سلاح ليهم هو الكرات الثابتة، ومع ذلك مهددوناش غير في كرة واحدة بس”.
وأوضح المدير الفني: “حزين طبعًا للخسارة، وكمان اللاعبين زعلانين، لأن الأداء كان جيد خصوصًا في الشوط الأول، لكن اللمسة الأخيرة كانت مش موفقة. بعد ما استقبلنا الهدف، الفريق فقد جزء من توازنه”.
وعن غياب زيزو، قال بيسيرو: “ما حاببش أتكلم عن اللي حصل مع أحمد مصطفى (زيزو)، تركيزي كله على المباراة بس”.
وتابع: “اشتغلنا الأيام اللي فاتت على خطة 4-3-3 وشوفت إنها الأنسب للمباراة دي. تغيير الخطة هو اللي خلاني ما أشركش صلاح مصدق. أما بالنسبة لمحمود بنتايك، فهو ما سافرش في مباراة الذهاب، وعشان كده ما بدأش أساسي في لقاء اليوم. فتوح قدم مستوى كويس في الذهاب، وكان منطقي يشارك النهاردة”.
وأكمل: “أنا مش بلوم أي لاعب على هدف ستيلينبوش، الكل عمل اللي عليه. صحيح كان ممكن نتعامل بشكل أفضل مع اللعبة، لكن ده جزء من اللعبة، ومحدش كان متوقع هدف للفريق الجنوب إفريقي بالشكل ده”.
واختتم بيسيرو تصريحاته قائلاً: “عارف إن جمهور الزمالك زعلان، وده طبيعي لأنه جمهور بيحب الانتصارات، لكن لازم نركز في اللي جاي ونكمل بنفس الروح. الدوري لسه قدامنا والزمالك هيقاتل لحد آخر لحظة”.
جوجل نيوز
تطبيق نبض
واتس اب
