كشف المطرب حودة بندق عن سبب اتجاهه لغناء المهرجانات، بجانب الألوان الأخرى التي قدمها في بدايته، مشيرًا إلى أن المهرجانات ساعدت في شهرته، مؤكدًا في الوقت نفسه أنه لا يصنف مطرب مهرجانات لأنه يقدم جميع الألوان.
وقال حودة بندق: “بدأت أقدم مهرجانات في 2014، بأغنية اه يا دنيا يا عندية وربنا كرمنا وانتشرت بشكل غير عادي، ومن هنا بقيت أقدم المهرجان بشكل أكبر لأن مكانش فيه إنتاج لأني في 2013، مضيت مع شركة إنتاج وفضلت معاهم لحد أواخر 2014، وخلال كل المدة دي عملت غنوة واحدة وكانت ديو غنائي”.
وتابع بندق: “وسبت الشركة ومكانش قدامي غير المهرجانات والنوعية دي من المزيكا هي اللي منتشرة، ولكني قدمتها بشكل مختلف وجبت كولة وكمانجا، وبالفعل الغنوة نزلت ونجحت واتشافت، وبعدها عملت غنوة يا بنات حلوين حلوين، وكانت الانتشار الأكبر وحققت حوالي 250 مليون مشاهدة والانطلاقة الأكبر كانت من هنا”.
وأضاف حودة: “قبل الانطلاقة والشهرة كنت قبلها قدمت الزوجة الرابعة مع مصطفى شعبان عام 2012، وبرنامج صولا مع أصالة وشيرين، وقبلها تتر فيلم البار في 2008، والحدث الأكبر بالنسبة لي كان جورج وسوف لأنه دعمني وشافني في حفلة وخدني بالحضن، واتكلم معايا في حاجات كتير”.
وتابع حودة بندق: “وبعد الحفلة قابلته في فندق وطلبني وقعدت معاه يومين، والمهرجانات ساعدت في شهرتي، وأنا مش ضد المهرجانات لكن ضد اللي بيقول كلام مش حلو، وقدمت مهرجانات كتير ولذيذة وأغانيا مش مهرجانات صرف، ولكن دخلت عليها نوع موسيقى تاني”.
وأكمل حودة: “أنا مش مصنف مطرب مهرجانات، ولكن عندي أغاني كتير غير المهرجانات وناجحة ودرما بحت، زي أغنية كان ليا حبايب، وحققت أرقام كبيرة والمشاهدات دي في شكل المزيكا ده كبيرة جدًا”.
جوجل نيوز
تطبيق نبض
واتس اب
