أوس أوس: سليمان كان نفسه يطلع حج هو ومراته

تحدث الإعلامي عمرو أديب في برنامجه “الحكاية”، عن وفاة الفنان سليمان عيد، إثر تعرضه لهبوط حاد في الدورة الدموية أدى إلى توقف حاد في عضلة القلب.

وقال عمرو: “مفيش ألم زي الموت المفاجئ، وسليمان عيد قبلها بعشر ساعات كان بيعزي، وفاجأة خبر وفاته نزل علينا زي الحجر، اتخطف يعيني وحالة عدم التصديق كانت مالية وشوش الناس في الجنازة“.

وفي مداخلة هاتفية للفنان صلاح عبد الله، قال: “صدمة المفاجأة كانت فظيعة أوي، أنا مش عارف أقول إيه، ده عشرة تجاوزت 25 سنة، من أيام ما كنت في الجامعة وهو كان لسه في خطواته الأولى، كان عشرة الاحتراف والصداقة والجيرة”.

وتابع صلاح: “وحكايات كتير كان نعم الأخ والصديق، للأسف الشديد من حوالي أسبوع أو 10 أيام كانت آخر مكالمة، ودي كانت أطول فترة منتكلمش فيها، ودايمًا كان بيقولي هاخدك ونخرج ونروح عند محمد إمام“.

أما عن أوس أوس، فقال: “كان نفسه يطلع حج هو ومراته السنة دي، وقدم عليها واخر حاجة قلهالي بكرة هنصلي مع بعض الجمعة، بس مكنتش عارف أنه مدي ميعاد لمصر كلها كنت فاكر متفق معايا أنا بس”.