إسلام عبد الشفيع: "مشهدي وأنا متعلق داخل الشبكة كان متعب جدًا.. وفيفي عبده ست بميت راجل"| خاص

تمكن الفنان إسلام عبد الشفيع، من تحقيق نجاحًا واسعًا، عقب مشاركته في بطولة مسلسل “العتاولة 2″، بجانب النجمان أحمد السقا وطارق لطفي، الذي يعرض الآن في رمضان 2025، من خلال شخصية “بيجو”، ابن الحاجة شديدة التي تقوم بدورها الفنانة فيفي عبده“.

وتحدث إسلام عبد الشفيع في تصريحات خاصة لـ موقع “الجورنال“، قائلًا: “حضرت شخصية بيجو من خلال جلسات مع المخرج أحمد خالد موسى، وطرح وجهات عدد من نظر”.

وتابع إسلام: “وده من خلال النقاش في شكل الشخصية خارجيًا وداخليًا، والمرجع اللى كان بالنسبة ليا هو شخصيات من الواقع، من حيث شكل الأداء واللبس وتاريخ الشخصية، ونشأتها اللي أثرت فيه وعليه”.

صعوبات تصوير مسلسل العتاولة 2

وقال “عبد الشفيع”: “طول الوقت أكيد بيكون فيه صعوبات، لأن كمان بنصور في عز الشتا، والنوات فى قلب المكس، وكنا بنصور جزء من المشهد ولسه مكملش، بسبب نوة ومطر، فنضطر نأجل ليوم تاني ونقوم بأعادة تصويره”.

وأشار إسلام إلى: “أكتر مشهد أثر فيا، هو مشهد عتابي لأمي مدام فيفي، بسبب حرماني وإني أقولها كلمة يا أمه، وعدم إعلانها عن كوني إبنها لحمايتي من أي خطر، ولعدم وجود شئ يكون نقطة ضعفها، فالمشهد ده كان من المشاهد المؤثرة”.

كواليس تعاون إسلام عبد الشفيع مع فيفي عبده

واستكمل إسلام عبد الشفيع: “بالنسبة للفنانة فيفي عبده، أو الست فيفي اللي بميت راجل، كانت مركزة جدًا، كما لو أنها أول مرة تقف قدام كاميرا، وشغفها وخوفها على شكل اللي جمبها قبل نفسها، التزامها المرعب في الأنضباط بمواعيد التصوير”.

وأضاف “عبد الشفيع”: “لدرجة كانت بتحضر في ميعادها، وهي نازلة من البيت بلبس ومكياي الشخصية ده داخل التصوير، وبره التصوير كانت أم وصاحبة وأخت، ست مصرية أوي على طبيعتها شبه الأم المصرية البسيطة العادية، لو حكيت عن مدام فيفي محتاجة كلام كتير لوحدها”.

كواليس مسلسل العتاولة 2

وقال إسلام عبد الشفيع: “الكواليس كانت هادية، والناس كلها بتحب بعض وتحترم بعض، من أول العامل البسيط لحد أكبر حد”.

وأكد “عبد الشفيع”: “أكتر مشهد متعب بالنسبالي، هو أول مشهد ليا في المسلسل، كان أول ظهوري وأنا متعلق داخل شبكة صيد ومرفوع بونش، كان صعب جدًا ومتعب جدًا جدًا”.

واردف إسلام: “التعاون مع فريق العمل كان في قمة الشياكة والاحترام، لأن أحنا بنتكلم عن نجمين أحمد السقا وطارق لطفي، عاصروا واشتغلوا مع أساتذة كبار على مدار تاريخهم الفني”.

واختتم إسلام عبد الشفيع حديثه، قائلًا: “وده كان واضح في تعاملهم مش معايا بس، لا مع كل شباب المسلسل، ونضيف على ده الفنان باسم سمرة، لا يختلف عنهم في شكل التعامل، وفعلًا باقي كاست العمل بما فيهم العنصر النسائي”.