“إنسان عنده نقص”.. أول رد من كزبرة على تصريحات محمد رمضان

حرص الممثل ومطرب المهرجان كزبرة، الرد على تصريحات الفنان محمد رمضان الأخيرة، من خلال “ستوري” عبر حسابه على موقع تبادل الصور والفيديوهات “إنستجرام”.

وكتب كزبرة: “اول حاجة الحمد لله على نعمة ربنا عليا وحبكم ورسائلكم الجميلة اللي بتوصلني ورد الفعل الجميل منكم على فيلم الحريفة 2.. كلام كتير نفسي اقوله واعبر بيه ليكم” .

وأضاف: “والله يجماعة الكلام ده نفسي اقوله من بدري، بس حاسس ان ده وقته انا مش عارف ليه كل لما انجح في ناس بتحاول تتطلع صورتي وحشة، انا بجد نفسيًا مبقتش قادر وبقالي فتره كبيرة كل لما اعمل حاجة حلوة مبقتش عارف اتبسط بيها، ونفسيا مش احسن حاجة”.

تابع كزبرة: “ربنا اللي عالم الواحد كل اللي يهمه انه يقدم حاجة تعجبكم وتسعدكم، بس في ناس بتتعامل مع اللي بيقدم حاجة كوميدية على اساس انه شخص تافه مش موهوب، والواحد عشان بيتعامل بطبيعته ومش بيتصنع بتحاولوا تشوفوا ازاي تطلعوا في عيب قدام جمهوره واخواته اللي بيحبيوه، زي أن يتنسبلي كلام مقلتهوش او يتقلل مني بحاجات قديمة عملتها”.

وواصل: “احيانًا الكلام عليا بيوصل للتريقة على اسمي بمجرد ما يعمل حاجة حلوة وتعجبهم، انا مش عارف ليه وده السبب الي ببيخلي انسان طيب أول ما ينجح يتحول لانسان عنده نقص، وعنده حرب مع كل الل حوليه زي ناس كتير نجحت وبقوا يتعاملوا بنرجسية عشان يعرفوا يتعاملوا مع الواقع”.

واختتم كزبرة حديثه، قائلًا: “فانا يجماعة مش عايز اوصل للمرحلة دي، انا عايز ابقي انسان طيب وفحالي واشتغل على نفسي واقدملكم فن يعجبكم ويبسطكم هو ده هدفي، فبلاش تتعاملوا مع الواحد باسلوب هو مش حبه، وشكرًا لكل واحد بيدعمني من قلبه واي حد بيحب اللي بقدمه او حتى بينتقده بأسلوب كويس انتم اللي تهموني”.