ميدو: فخور بانتمائي للزمالك ولن أغير موقفي حتى النهاية

حسم أحمد حسام “ميدو”، نجم الزمالك السابق، الجدل الذي أثير خلال الأيام الأخيرة بعد تصريحاته عن عدم تشجيعه للنادي الأهلي في بطولة كأس العالم للأندية 2025.

جاء ذلك عندما تلقى ميدو سؤالاً في أحد البرامج الرياضية حول ما إذا كان سيدعم الأهلي في البطولة، فأجاب بكل وضوح بأنه لن يشجعه، مؤكدًا أنه يُشجع الزمالك فقط.

تصريحات ميدو أثارت ردود فعل متباينة في الوسط الرياضي، حيث انقسمت الآراء بين مؤيد ومعارض لما قاله، وشهدت منصات التواصل الاجتماعي وبرامج التحليل الرياضي نقاشات مكثفة حول الموضوع.

وعلى حسابه بمنصة “إكس”، كتب ميدو: “‏انا ابن ‎الزمالك، وأكبر فخر ليا في حياتي إني ابن المدرج، ابن الثالثة يمين، بلعب في الزمالك من وأنا عندي 9 سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك”.

وأضاف: “بطاقتي وأنا عيل صغير هي كارنيه اتحاد الكرة إللي مكتوب عليه اسم الزمالك.. تتلمذت على إيد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أيًا كان بيلاعب مين ولكن في نفس الوقت اتربيت إني أحترم كل المنافسين وأهنيهم لو كسبوا وأبارك لهم وأقول لهم هارد لك لو خسروا”.

وواصل: “هو ده معنى الروح الرياضية بالنسبة لي!!، لما اتسألت في الاستوديو هتشجع الأهلي في كأس العالم للأندية رديت بطبيعتي دون أي نفاق أو كذب، لأن بكل بساطة مفيش حاجة في الدنيا تستاهل إنك تكون كذاب ومنافق!، اتفق معاكم إن التوقيت ما كانش مناسب، وبعتذر لأي حد زعل إني قلت الكلام ده في حدث مهم يخص النادي ‎الأهلي، وأنا شايف الناس إللي زعلت بخصوص إن الوقت مش مناسب عندهم كل الحق”.

وشدد ميدو: “أما لو اتسألت مليون مرة هتشجع أي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت، أما بخصوص الهجوم إللي بتعرض له فأنا عاذر الناس، لأنهم ممكن يكونوا اتعودوا على إجابات مختلفة في السنوات الأخيرة من ناس تصدروا المشهد في الإعلام وهم أكتر ناس بيأذوا المنافس في الخفاء، وأكتر ناس بتتمنى من قلبها خسارة المنافس من جواهم”.

واستكمل: “مش هرد على أي حد هاجمني، لأن بكل بساطة أنا في مرحلة في حياتي شايف إن مفيش حاجة في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس، بالنسبة لي ماتتعداش أكتر من كده!!”.

واختتم: “مرة ثانية بعتذر إني كنت سبب في جدال قائم الأيام إللي فاتت، للأسف مش ذنبي، ولكن بسبب مدمنين الترند والدخلاء على كرة القدم إللي لا يمكن يفهموا أبدا عقلية مشجع الكورة!!”.